بی جے پی ایم پی ڈی۔ اروِند کے خلاف مقدمہ درج، پولنگ عملہ کو دھمکانے کا الزام

نظام آباد، اے بی نیوز:

تلنگانہ کے نظام آباد میونسپل کارپوریشن کے 34 ویں ڈویژن میں واقع ہریچرن مارواڈی پولنگ سینٹر پر میونسپل انتخابات کے دوران پیش آئے واقعہ کے سلسلے میں بی جے پی رکنِ پارلیمنٹ ڈی۔ اروِند کے خلاف مقدمہ درج کرلیا گیا ہے۔

پولیس کے مطابق، ڈی۔ اروِند اپنے تقریباً 7 تا 8 حامیوں کے ہمراہ پولنگ بوتھ نمبر 285، 286 اور 287 میں داخل ہوئے۔ الزام ہے کہ انہوں نے اسٹِل اور ویڈیو کیمروں کے ذریعے ڈیوٹی پر موجود پولنگ عملے اور پولیس ملازمین کو دھمکیاں دیں اور نامناسب الفاظ استعمال کرتے ہوئے خوف و ہراس پھیلانے کی کوشش کی۔

نظام آباد ون ٹاؤن پولیس اسٹیشن کے انسپکٹر بی۔ راگھوپتی نے بتایا کہ بوتھ نمبر 287 کے باہر امیدواروں کی موجودگی اور بعض انتظامی امور پر ڈی۔ اروِند نے شدید ناراضگی ظاہر کی اور دھمکی آمیز زبان استعمال کی۔ انہوں نے مبینہ طور پر کہا کہ اگر کسی کو پولنگ مرکز سے باہر بھیجا گیا تو اسے اس کے نتائج بھگتنا ہوں گے۔ واقعہ کے بعد ٹاؤن-1 پولیس اسٹیشن میں کراس نمبر 51/26 درج کرتے ہوئے بھارتیہ نیایا سنہتا (BNS) کی دفعات 132، 223، 296(b) اور تلنگانہ میونسپلٹیز ایکٹ 2019 کی دفعہ 226 کے تحت قانونی کارروائی شروع کردی گئی ہے۔ پولیس کا کہنا ہے کہ معاملہ کی تحقیقات جاری ہیں اور قانون کے مطابق مناسب کارروائی کی جائے گی۔